Joh 8 | MCQ | STEP | 'Ejume Jesuho Arivi huri'i va'ana.

John 8

Napara Ka'ene Parui Ahema O'eme Piunavajina

1 'Ejume Jesuho Arivi huri'i va'ana. 2 'Ena'omo sú'o vea mai'o ahara sama kamino kú'o 'unama va'e Temiporu vaji va'eme ea mapoka nianaa roume Hu asuma hine najahana. 3 Sikuraipia 'ee Parasiapo napara pina parua turavumakame aheme apene roe puni rira mu'oi ranavume naminana. 4 Pu Hu ijá 'wava Najahi'ine naparakaho parua turame 'o'eme nú piunavara. 5 Mosisi oni tamana ija'ina 'warumana. Napara ija'inijija muni 'eke 'anie kwamasahuna 'úmana. Nú ichá'ina vehuna'e A vwihano? 'wavara. 6 Pu Hu 'warava jihuni maijaho pu vena kave Hu ichá'ina veja ka'avajaho ijihuni 'ahi namiji'i Hua'e nama'i 'ahiume avajara. 'Enakaivo Hu sarasaru hine mwe'ahi Huni iji asura venana. 7 'E'eme pu ijá namine apoma pasonananavume Hu ahasirima 'uriji'i ijá 'iama Ja namijuri vajaki ea pini sisea niho'o pavenuna vwi'amajara marako'a muna apene hu 'ana'amana 'iamana. 8 'E'ika'i Hu kú'o sarasaru hiji'i mwe'a 'ahi asura venana. 9 'E'eme pu ijí henareja ea kwinu kwino emakiniji rene va'e va rana'ika'i Jesu Huhusu napara ka'ene rira mu'oi hu hu'úmo namina kaji'i irechamia va ranavara. 10 'Ejume Jesu 'uriji'i napara kajaho ijá 'wama Napare ea ka'ene a namahujija ichihune? 'Ú ea pina pahine a namahane? 'wamana. 11 Hu ijá 'wama Natohwe ea pina pana 'wamana. 'Ejume Jesu ijá 'wama Na 'u'o a panamahunakúne va'a. 'Enakaivo iviamaa rene kú'o sisea pave'amana 'wamana.

Jesuho Mwe'a Kehuni Hanaji'inijina

12 Jesu kú'o ijá 'iama Na mwe'a kehuni hanaji'ina. 'Ena'omo ea irara Na 'ararihi'amajaho hu nututa niho'o areri paohuna. 'Enakaivo hu ira ka'ene majama hihunijaho apehuna 'iamana. 13 'Ejume Parasijipo ijá 'wava A orono ronare'e 'warumajaho niho'o nimaa pana 'wavara. 14 Jesu eha vene ijá 'iama Pana Na onuno ronare'e 'waravujaho nimaa nimai. Ijihuni maijaho Nara ichihi rena roujaho Na nihene 'ee Nara ichihi vahunijaho niheju kaivo ja niho'o Nara ichihi rena roujaho paheji'ine 'ee Nara ichihi vahunijaho ja paheji'ina. 15 Ja haha huni 'unamiji namahura kaivo Na ea pina panamahu. 16 'Enakaivo Na ea nama'ujaho Nara namahujija nimai. Ijihuni maijaho Nanasu pana kaivo Nuni Oma ka'ene Na ranamiume rouji'i Nú rene namahura. 17 Joni tamana heha 'ahi asura ika'ina vejara. Ea no'o kavara'e re'amajaho nimaa 'wavura. 18 Na onuno hena kavuji rone 'warame 'ee Amo ka'ene Na ranamiume roujara hena kimuna'e 'waravu 'iamana. 19 'Ejume pu Hu ijá 'wava Omuna ichihune? 'wavara. 'Ejume Jesu eha vene ijá 'iama Ja Na pahene pakivu jihuna'e Nuni Oma 'u'o pahene pakavura. Ja Na hena ki'ipisa ja Nuni Oma 'u'o hena kava'a 'iamana. 20 Temiporu vaji ruha ka'ene katua irechavujino ira ikijahija najahajaho ea haha 'aha ija paranavara. Ijihuni maijaho Huni vea mai'o paapenana.

Nara Va'ujaho Ja Areri Pavuhuna

21 'Enarena Hu kú'o pu ijá 'iama Na vahuna. 'E'eje ja Na sarihuna kaivo ja joni sisei jihuna'e kwamasahuna. Ja Nara kwaa ka'ene va'ujaho pavuhuna 'iamana. 22 'Ejume Juapo ijá 'wava Hura ijá 'úmujaho Nara kwaa ka'ene va'ujaho ja pavuhuna 'úmujaho 'ú Hu ori'ini 'ana'arahuna'e 'warumo? 'wavara. 23 Hu pu ijá 'iama Ja mwe'a harake ora kaivo Na ichutohuna. 'Ene ja mwe'a kehuna kaivo Na mwe'a kehuna pana. 24 Ijihuna'e Na ijá 'iavujaho ja joni sisei jihuna'e kwamasahuna. Ja Na panimaa ro'avajaho Na ea Ijina'omo ja joni sisei jihuna'e kwamasahuna 'iamana. 25 'Ejume pu ijá 'wava A irarane? 'wavara. 'Ejume Jesu ijá 'iama 'Ú Na kami aneji rene iraka 'warame apene route? 26 Na uneunecha mapoka ja 'warame namahuna kaivo Godi ka'ene Na ranamiume roujaho nimaa nimaa'omo Na raka ka'ene Huni hejujiru mwe'aki 'waravu 'iamana. 27 Hu Omaha rona 'waramajaho pu pahejara. 28 'Ejume Jesura ijá 'iama Vea ka'ene ja Emaa Puni Harihiji 'unama apena ahasiri'avajino ja Na Ea iraho hena kihuna. Nara unenu'u pina Nuni vwihai vehuna pana kaivo Amora najihajiru Na veju. 29 Godi ka'ene Na ranamiume roujaho Nú hu'úmo hinuna. Hu niho'o Na paranamie ani va'u. Ijihuni maijaho uneunecha ka'ene Nara na'ia mapoka vejujara Hu teamamuna 'iamana. 30 Hu uneunecha kaji 'waravumakame ea mapoka roe nimaa rojara.

Nimaijara Venae Maranihunijina

31 'Ejume Jesura Jua ka'ene Hu nimaa rojajija ijá 'iama Nuni Ira ka'ene joni oja vaji namuji ja venapene va'avajaho ja nimaa nimaa Nuni tisaiporua. 32 Ijihuni hahi ja nimaa nimaiji he'avajaho nimaa nimaa kajara veje ja sisea huni harura hara pahihuna 'iamana. 33 'Ejume pu eha vene Hu ijá 'wava Nú Eparahami oni amuhija'omo nú ea 'ahopuni pwea parejara. 'Ena'e a ichá vene ja sisea huni harura hara pahiha 'úmo? 'wavara. 34 'Ejume Jesu eha vene pu ijá 'iama Na nimaa nimai ja 'waravu. Ea ka'ene sisea vejujaho sisea kajihuni pwea rejura. 35 'Enakaivo pwea ea kachi'ina pu'úmo majama pahinuna kaivo hariha ijara sea vaja majama hinuna. 36 'Ena'omo Harihijara veje ja sisea huni harura hara pahi'avajaho ja nimaa nimaa sisea huni harura hara pahiju. 37 Na nihejujaho ja Eparahami oni amuhija. 'Enakaivo Nuni ira joni oja vaji panamu jihuna'e ja ura Na 'ani'iro 'ahiu'e sarivu. 38 Na raka ka'ene Amo oni una'i kivuji 'waravu kaivo ja 'u'o joni omijara vejume ja kivaji veju 'iamana. 39 'Ejume pu Hu ijá 'wava Eparahamiho núni oma 'wavara. 'Ejume Jesu ijá 'iama Ja Eparahami oni amuhija re'ipisa ja Eparahamira venujiru veja'a. 40 Na ea ka'ene Godina'i nimaiji hena 'waravujina. 'Ena'omo ja Na 'ani'irono sarivu. Eparahami ija'ina paveja'a. 41 Ja joni omijara raka ka'ene venuji veju 'iamana. 'Ejume pu Hu ijá 'wava Nú Oma pa'ana pana kaivo núni Oma Godina 'wavara. 42 'Ejume Jesu pu ijá 'iama Godiho joni Oma re'ipisa ja Na oja miha'a. Na Godoni rena routa. Ijihuni maijaho Na Nuni oja pa'ene routa kaivo Godira ranamiume routa. 43 Ja rakijihuna'e Nara raka ka'ene 'waravujaho pahejare? Ijihuni maijaho ja Nuni ira pahejura. 44 Ja oma jona ka'ene Setani oni harihija. Ijihuni hahi ja ura oma jona kajara venuja'ina ve'iro 'ahiu. Nitama anejijino rene hu ea 'aniuna. 'Enakaivo hu 'unama nimaa nimaijaho niho'o pahihuna. Ijihuni maijaho nimaa nimaijaho huni oja vaja panamuna. 'Eju'ukame huni vaja ira'ati rarena jihuna'e hu ira'ataru 'waramuna. Ijihuni maijaho hu ira'asine 'ee ira'asine puni oma. 45 Na nimaa nimaa 'waravu'ukame ijihuna'e ja Na panimaa roju. 46 Ja ea irara iviamaa Nuni sisea 'wari'ena? Na nimaiji 'waravu kaivo ja irakijihuna'e Na panimaa rojo? 47 Godoni eijija pu Godoni iraru hejura. Ja Godoni ira paheju jihuni maijaho ja Godoni ea pana 'iamana.

Jesu'o Eparahami Puni Vu'ijina

48 'Ejume Juapo eha vene Hu ijá 'wava Nú A Sameria ora 'wame 'ee 'avena sisea A ajimai'ina 'wavujaho nimaa'e 'wavure? 'wavara. 49 Jesu eha vene ijá 'iama Na 'avena sisea pa'ajimi'ina kaivo Nara Amoni iha ta'arohu kaivo ja veju'e Na junimu. 50 Na Nuni iha onuno pata'arosaravura kaivo Godira Nuni iha ta'arohe 'ee mina vena kimuna. 51 Na nimaa nimai ja 'waravu. Ea irara Nuni ira ike ija kisi 'uname huni vaji rana'amajaho hu kwahuna pakahuna 'iamana. 52 'Ejume Juapo ijá 'wava Nú nihejujaho A 'avena sisei ajimana. Eparahami kwavume 'ee poropetia 'u'o kwamasahara kaivo A ijá 'úmo Ea irara Nuni ira hene venujaho niho'o pakwa'ena 'úmu. 53 'Ú A Eparahami ka'ene natohwijaho 'ee poropetia ka'ene kwamasahajija asitahane? A ea rana rone avano? 'wavara. 54 Jesura pu eha vene ijá 'iama Na Onuno Nuni pinana 'uname ahasiri'ipisa Nuni pinana maa pa'ana'e reja'a kaivo Nuni Omijara Nuni pinana 'unama ahasirimu. 'Eju'e ja ijá 'wavo Hu núni Godia 'wavu. 55 Ja mai'o Hu paheji'ina kaivo Na Hu heji'ina. Nara ijá 'wara'ipisa Na Hu pahejura 'i'ipisa jara ira'ata vejuja'ina veju'u. 'Enakaivo Na Hu nihene 'ee Huni Irijaho vejura. 56 Joni oma Eparahamiho Nuni veiji kahuni jihuna'e niho'o teamama paranana'omo hu kamarena teamamana 'iamana. 57 'Ejume Juapo Hu ijá 'wava A mai'o Oni juara mapoka (50) papa'arena kaivo 'ú A Eparahamiho nikamane? 'wavara. 58 'Ejume Jesu ijá 'iama Na nimaa nimai ja 'waravu. Eparahamiho mai'o panaheji'ini Na ni ijí hijuta 'iavume 59 pura muni 'eka 'ana'iro vejara kaivo Jesu Temiporu vaja kajino taname nesi paka'eme puni vaja kajino va 'e'une va'ana.